ಕೊನೆಗೂ ಆರ್ಥಿಕತೆ ಸುಧಾರಣೆಗೆ ಮುಂದಾದ ಮೋದಿ ಸರ್ಕಾರ : ಬಡ್ಡಿ ದರ ಕಡಿತ, 70 ಸಾವಿರ ಕೋಟಿ ಪ್ಯಾಕೇಜ್​ ಘೋಷಣೆ

ನವದೆಹಲಿ : ಕೊನೆಗೂ ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಬಿಜೆಪಿ ಸರ್ಕಾರ ಎಚ್ಚೆತ್ತುಕೊಂಡತಿದೆ. ದೇಶದ ಆರ್ಥಿಕತೆ ಸುಧಾರಣೆಗೆ ಕೆಲವು ಕಟ್ಟುನಿಟ್ಟಿನ ಕ್ರಮಗಳನ್ನ ಕೈಗೊಳ್ಳಲು ಮುಂದಾಗಿದೆ. ಈ ಕುರಿತು ನವದೆಹಲಿಯಲ್ಲಿ ಸುದ್ದಿಗೋಷ್ಠಿ ನಡೆಸಿದ, ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್, ಬ್ಯಾಂಕ್​​ಗಳು ಬಡ್ಡಿ ದರ ಕಡಿತ ಮಾಡಲಿದ್ದು, ಇನ್ಮುಂದೆ ಮನೆ ಹಾಗೂ ವಾಹನ ಮೇಲಿನ ಸಾಲದ ಬಡ್ಡಿ ದರ ಮತ್ತಷ್ಟು ಕಡಿತವಾಗಲಿದೆ ಎಂದು ತಿಳಿಸಿದರು.

ಪ್ರಮುಖವಾಗಿ ದೇಶದಲ್ಲಿ ಆಟೋ ಮೊಬೈಲ್​ ಕ್ಷೇತ್ರ ಗಣನೀಯವಾಗಿ ಕುಸಿತ ಕಂಡಿದ್ದು, ಅದರ ಉತ್ತೇಜನಕ್ಕೆ ಕ್ರಮಕೈಗೊಳ್ಳೋದಾಗಿ ತಿಳಿಸಿದ್ರು. ಕಾರ್ಪೊರೇಟ್​ ಸಾಮಾಜಿಕ ಬದ್ಧತೆ ಉಲ್ಲಂಘನೆ ಮಾಡುವುದು ಯಾವುದೇ ರೀತಿಯಲ್ಲೂ ಅಪರಾಧವಲ್ಲ ಎಂದು ಇದೇ ವೇಳೆ ಅವರು ತಿಳಿಸಿದ್ರು.

ದೀರ್ಘಾವಧಿ ಹಾಗೂ ಅಲ್ಪಾವಧಿ ಬಂಡವಾಳ ಲಾಭದ ಮೇಲಿನ ಸುಂಕ ತೆಗೆಯುವುದು, ಸ್ಟಾರ್ಟ್​​ ಅಪ್​​ಗಳ ಮೇಲಿನ ಸುಂಕ ರದ್ದು, ತೆರಿಗೆ ಪಾವತಿ ಪ್ರಕ್ರಿಯೆಯನ್ನ ಮತ್ತಷ್ಟು ಸರಳ ಮಾಡುವುದು, ಆರ್ಥಿಕತೆ ಕುಸಿತದ ಭೀತಿಯನ್ನ ಎದುರಿಸುವುದು ಸೇರಿದಂತೆ ಹಲವು ಆರ್ಥಿಕ ಸುಧಾರಣೆಗಳನ್ನ ಘೋಷಣೆ ಮಾಡಿದ್ರು.

ಅಲ್ಲದೆ, ಬ್ಯಾಂಕ್​​ಗಳ ಪುನಶ್ಚೇತನಕ್ಕೆ 70 ಸಾವಿರ ಕೋಟಿ ಪ್ಯಾಕೇಜ್​ಅನ್ನ ಅವರು ಘೋಷಣೆ ಮಾಡಿದ್ರು. ಕೇಂದ್ರ ಸರ್ಕಾರ ವಿದೇಶಿ ಪೋರ್ಟ್​ಫೋಲಿಯೋ ಇನ್​​​ವೆಸ್ಟ್​ ಮೇಲೆ ವಿಧಿಸಿದ್ದ ಹೆಚ್ಚುವರಿ ಶುಲ್ಕವನ್ನೂ ಕೂಡ ರದ್ದು ಪಡಿಸೋದಾಗಿ ನಿರ್ಮಲಾ ಸೀತಾರಾಮನ್​ ಹೇಳಿದ್ರು.

ಕೇಂದ್ರ ಸರ್ಕಾರದ ಈ ನಡೆಯಿಂದ ಭಾರತಕ್ಕೆ ಎದುರಾಗಿದ್ದ ಆರ್ಥಿಕ ಸಂಕಷ್ಟದ ಭೀತಿ ಕೊಂಚ ಕಡಿಮೆ ಆಗಬಹುದು ಎನ್ನಲಾಗಿದೆ.