ಕಳೆದ ಸಂಪರ್ಕ ಮರು ಸ್ಥಾಪನೆಗೆ ಯತ್ನ..? ಲ್ಯಾಂಡರ್‌ ಇಮೇಜ್‌ ಇಸ್ರೋ ಪಾಲಿಗೆ ಭರವಸೆಯ ಬೆಳ್ಳಿಕಿರಣ..?

ಬೆಂಗಳೂರು: ಭಾರತೀಯ ಬಾಹ್ಯಾಕಾಶ ಸಂಸ್ಥೆ ಇಸ್ರೋದ ಮಹಾತ್ವಾಕಾಂಕ್ಷೆಯ ಚಂದ್ರಯಾನ ೨ರ ಲ್ಯಾಂಡರ್‌ ʻವಿಕ್ರಮ್‌ʼ ಕೊನೆ ಕ್ಷಣದಲ್ಲಿ ಸಂಪರ್ಕ ಮೊಟಕುಗೊಳಿಸಿಕೊಂಡು ಕಾಣೆಯಾಗಿದ್ದು ಇಸ್ರೋ ವಿಜ್ಞಾನಿಗಳು ಅದರ ಜೊತೆ ಸಂಪರ್ಕ ಸಾಧಿಸಲು ದತ್ತಾಂಶಗಳನ್ನ ಕಲೆಹಾಕುತ್ತಿದ್ದಾರೆ.

ಈ ಮಧ್ಯೆ ಇಸ್ರೋ ಮುಖ್ಯಸ್ಥ ಕೆ.ಶಿವನ್‌ ನ್ಯೂಸ್‌ ಏಜೆನ್ಸಿಗಳಿಗೆ ಮಾಹಿತಿ ನೀಡಿ ಕಳೆದುಹೊದ ವಿಕ್ರಮ್‌ , ಚಂದ್ರನ ಮೇಲ್ಮೈಲ್ಲಿ ತಿರುಗುತ್ತಿರುವ ಫೋಟೋ ದೊರೆತಿದೆ, ಅದರ ಜೊತೆ ಸಂಪರ್ಕ ಸಾಧಿಸಲು ಪ್ರಯತ್ನಿಸುತ್ತಿದ್ದೇವೆ ಎಂದಿದ್ದಾರೆ.

ವೈಫಲ್ಯ ಅವಲೋಕನ ಸಮಿತಿ ( ಫೇಲ್ಯೂರ್‌ ಅನಾಲಿಸೀಸ್‌ ಕಮಿಟಿ) ವಿಕ್ರಮ್‌ ಕಣ್ಮರೆಯಾಗಲು ಕಾರಣವನ್ನ ಹುಡುಕುತ್ತಿದೆ. ಚಂದ್ರನ ಮೇಲ್ಮೈ ಪ್ರತಿಕೂಲ ವಾತಾವರಣಕ್ಕೆ ಹೆದರಿ ವಿಕ್ರಮ್‌ ಸ್ತಬ್ಧವಾಗಿರಬೇಕು, ಮಾಡ್ರಿಡ್‌ನಲ್ಲಿರುವ ನಾಸಾದ ಡೀಪ್‌ ಸ್ಪೇಸ್‌ ನೆಟ್ವರ್ಕ್‌ ಸೆಂಟರ್‌ ಹಾಗೂ ಮಾರಿಷಸ್‌ ನಲ್ಲಿರುವ ಇಸ್ರೋದ ಕೇಂದ್ರದಿಂದ ವಿಕ್ರಮ್‌ ಸಂಪರ್ಕಕ್ಕೆ ಸಾಕಷ್ಟು ಪ್ರಯತ್ನಿಸಲಾಗುತ್ತಿದೆ. ಈಗಾಗಲೇ ಸಾಕಷ್ಟು ದತ್ತಾಂಶಗಳನ್ನ ಪಡೆದುಕೊಂಡಿದ್ದು ಅವುಗಳ ಅವಲೋಕನದಿಂದ ವಿಕ್ರಮ್‌ ಇರುವ ಜಾಗ ಪತ್ತೆಹಚ್ಚಿ ಸಂಪರ್ಕ ಸಾಧಿಸುವ ಅವಕಾಶ ಇದೆ ಎಂದು ಇಸ್ರೋ ವಿಜ್ಞಾನಿಗಳು ಹೇಳಿದ್ದಾರೆ.