ಅಮರನಾಥ ಯಾತ್ರೆಗೆ ಉಗ್ರರಿಂದ ಅಡ್ಡಿ : ಪಾಕಿಸ್ತಾನವೇ ಟೆರರಿಸ್ಟ್​​​ಗೆ ನೆರವು

ನವದೆಹಲಿ : ಅಮರನಾಥ ಯಾತ್ರೆ ಮಾರ್ಗದಲ್ಲಿ ಉಗ್ರರು ದಾಳಿ ನಡೆಸಲು ಸಂಚು ರೂಪಿಸಿದ್ದು, ಭಯೋತ್ಪಾದಕರು ದಾಳಿ ನಡೆಸಲು ಪಾಕಿಸ್ತಾನ ಸೇನೆ ನೆರವು ನೀಡುತ್ತಿದೆ ಎಂದು ಭಾರತೀಯ ಸೇನೆ ಗಂಭೀರ ಆರೋಪ ಮಾಡಿದೆ. ಪಾಕಿಸ್ತಾನ ಸೇನೆಯ ಸಹಾಯದಿಂದ ಉಗ್ರರು ಅಮರನಾಥ ಯಾತ್ರೆಗೆ ಅಡ್ಡಿಪಡಿಸಲು ಯತ್ನ ನಡೆಸಿದ್ದಾರೆ. ಅಮರನಾಥ ಯಾತ್ರಿಗಳ ಮೇಲೆ ದಾಳಿ ನಡೆಸಲು ಸಂಚು ರೂಪಿಸಿರೋದು ಬಹಿರಂಗವಾಗಿದೆ. ಇದಕ್ಕೆ ಸಂಬಂಧಿಸಿದ ಸ್ಫೋಟಕ ಹಾಗೂ ರೈಫಲ್​​ಗಳನ್ನ ವಶಕ್ಕೆ ಪಡೆದಿರೋದಾಗಿ ಭಾರತೀಯ ಸೇನೆಯ ಲೆಫ್ಟಿನೆಂಟಲ್ ಜನರಲ್ ಕೆ.ಎಸ್​.ಜೆ ಧಿಲ್ಲೋನ್​ ತಿಳಿಸಿದ್ದಾರೆ.

ಭಾರತೀಯ ಸೇನೆ ಮಾಡಿರೋ ಗಂಭೀರ ಆರೋಪದಿಂದ ಪಾಕಿಸ್ತಾನದ ದ್ವಿಮುಖ ನೀತಿ ಬಯಲಾಗಿದೆ. ಶುಕ್ರವಾರ ಕಾಶ್ಮೀರ ಪೊಲೀಸರು ಮತ್ತು ಭಾರತೀಯು ಸೇನೆ ಅಧಿಕಾರಿಗಳೂ ಜಂಟಿಯಾಗಿ ಸುದ್ದಿಗೋಷ್ಠಿ ನಡೆಸಿ, ಈ ಆಘಾತಕಾರಿ ವಿಷಯವನ್ನ ಬಹಿರಂಗ ಮಾಡಿದ್ರು.

ಅಮರನಾಥ ಯಾತ್ರೆಯ ಮಾರ್ಗದ ಪ್ರದೇಶಗಳಲ್ಲಿ ಕಳೆದ ಎರಡು ಮೂರು ದಿನಗಳಿಂದ ಸೇನೆ ಕಾರ್ಯಾಚರಣೆ ನಡೆಸಿದೆ. ಈ ವೇಳೆ, ಅಪಾರ ಪ್ರಮಾಣದ ಶಸ್ತ್ರಾಸ್ತ್ರ, ಸ್ಫೋಟಕಗಳು ಸಿಕ್ಕಿವೆ. ಭೂಮಿಯಲ್ಲಿ ಹುದುಗಿಟ್ಟಿದ್ದ ಸ್ಫೋಟಕಗಳು, ಟೆಲಿಸ್ಕೋಪಿಕ್​ 24 ಅಮೆರಿಕನ್ ರೈಫಲ್​ ಕೂಡ ಸಿಕ್ಕಿದೆ ಎಂದು ಭಾರತೀಯ ಸೇನೆ ಹೇಳಿದೆ. ಇದರಲ್ಲಿ ಪಾಕಿಸ್ತಾನ ಸೇನೆಯ ಕೈವಾಡ ಇರೋದು ಸ್ಪಷ್ಟ ಎಂದು ಜೆ.ಧಿಲ್ಲೋನ್ ತಿಳಿಸಿದ್ದಾರೆ.