ಅನುಷ್ಕಾ ಶೆಟ್ಟಿಯ ಕನ್ನಡ ಪ್ರೀತಿ : ರಶ್ಮಿಕಾಗೆ ಟಾಂಗ್​ ಕೊಟ್ಟರಾ ಸ್ವೀಟಿ..?

ಹೈದರಾಬಾದ್​ : ನಟಿ ಅನುಷ್ಕಾ ಶೆಟ್ಟಿ ಯಾರಿಗೆ ತಾನೆ ಗೊತ್ತಿಲ್ಲ ಹೇಳಿ. ಕಳೆದ 10 ವರ್ಷಗಳಿಂದ ತೆಲುಗು ಮತ್ತು ತಮಿಳು ಭಾಷೆಯಲ್ಲಿ ನಂಬರ್​ ಒನ್​ ನಟಿಯಾಗಿರೋ ಅನುಷ್ಕಾ ಶೆಟ್ಟಿಗೆ ಕನ್ನಡದ ಮೇಲೆ ವಿಶೇಷ ಪ್ರೀತಿ ಇದೆ. ಕನ್ನಡದಲ್ಲಿ ಸಿನಿಮಾ ಮಾಡದೇ ಇದ್ರೂ, ಕನ್ನಡವನ್ನ ಅಚ್ಚುಕಟ್ಟಾಗಿ ಮಾತನಾಡುತ್ತಾರೆ. ಇತರೆ ತಾರೆಯರಂತೆ ನನಗೆ ಕನ್ನಡ ಬರಲ್ಲ ಎಂದು ಹೇಳೋದಿಲ್ಲ. ಆದ್ರೀಗ ಮತ್ತೆ ಅನುಷ್ಕಾ ಶೆಟ್ಟಿ, ಕನ್ನಡದಿಂದಲೇ ಸುದ್ದಿಯಾಗಿದ್ದಾರೆ.

ತಾಯಿ ಜನ್ಮದಿನಕ್ಕೆ ಕನ್ನಡದಲ್ಲಿ ಶುಭಾಶಯ

ಹೌದು, ಇವತ್ತು ನಟಿ ಅನುಷ್ಕಾ ತಾಯಿ ಅವರ ಜನ್ಮದಿನ. ತನ್ನ ತಾಯಿಯ ಹುಟ್ಟುಹಬ್ಬಕ್ಕೆ ಫೇಸ್​ಬುಕ್​ನಲ್ಲಿ ವಿಶ್ ಮಾಡಿರುವ ಅನುಷ್ಕಾ, ಜನ್ಮದಿನದ ಹಾರ್ದಿಕ ಶುಭಾಶಯಗಳು ಅಮ್ಮಾ ಎಂದು ಕನ್ನಡದಲ್ಲೇ ಶುಭ ಕೋರಿದ್ದಾರೆ. ಅನುಷ್ಕಾ ಕನ್ನಡದಲ್ಲಿ ಶುಭ ಕೋರಿರುವುದಕ್ಕೆ ಅಭಿಮಾನಿಗಳು ಶಹಬ್ಬಾಸ್​ ಗಿರಿ ಕೊಟ್ಟಿದ್ದಾರೆ. ಕಳೆದ 10 ವರ್ಷಗಳಿಂದ ಚಿತ್ರರಂದಲ್ಲಿದ್ದರೂ, ನಂಬರ್ ಒನ್ ನಟಿಯಾಗಿದ್ದರೂ ಕನ್ನಡದ ಮೇಲಿನ ಪ್ರೀತಿ ಕಡಿಮೆಯಾಗಿಲ್ಲ. ನಿಮ್ಮ ಕನ್ನಡ ಪ್ರೀತಿಗೆ ಅಭಿನಂದನೆಗಳು ಎಂದು ಅಭಿಮಾನಿಗಳು ಕಾಮೆಂಟ್​ ಮಾಡ್ತಿದ್ದಾರೆ.

ಅನುಷ್ಕಾ ಕನ್ನಡ ಪ್ರೀತಿ.. ರಶ್ಮಿಕಾಗೆ ಸಂಕಷ್ಟ..!

ಇತ್ತೀಚೆಗಷ್ಟೇ ಕನ್ನಡ ಮಾತನಾಡಲು ಕಷ್ಟ ಆಗುತ್ತೆ ಎಂದು ಸಂದರ್ಶನವೊಂದರಲ್ಲಿ ಹೇಳಿ ಕನ್ನಡಿಗರ ಕೆಂಗಣ್ಣಿಗೆ ಗುರಿಯಾಗಿದ್ದ ರಶ್ಮಿಕಾ ಈಗ ಮತ್ತಷ್ಟು ಮುಜುಗರ ಅನುಭವಿಸಬೇಕಾಗಿದೆ. ಯಾಕಂದ್ರೆ, ಕನ್ನಡ ಸಿನಿಮಾದಲ್ಲಿ ನಟಿಸದೇ ಇದ್ರೂ, ಅನುಷ್ಕಾ ಮಾತ್ರ ಕನ್ನಡದಲ್ಲಿ ಶುಭ ಹಾರೈಸಿದ್ದಾರೆ. ಅಲ್ಲದೆ, ಈವರೆಗ ಎಲ್ಲೂ ಕೂಡ ಕನ್ನಡ ಬರುವುದಿಲ್ಲ ಎಂದು ಹೇಳಿಲ್ಲ. ಆದ್ರೆ, ರಶ್ಮಿಕಾ ಎರಡು ಮೂರು ವರ್ಷಗಳ ಸಿನಿಮಾ ಜರ್ನಿಯಲ್ಲೇ ಕನ್ನಡ ಬರುವುದಿಲ್ಲ ಎಂದಿರೋದು ಆಕ್ರೋಶಕ್ಕೆ ಕಾರಣವಾಗಿದೆ.

ಕನ್ನಡ ಚಿತ್ರರಂಗದ ಅಭಿಮಾನಿಗಳು ಅನುಷ್ಕಾ ಫೇಸ್​ಬುಕ್​ನಲ್ಲಿ ರಶ್ಮಿಕಾ ಮೇಲಿನ ಸಿಟ್ಟನ್ನೂ ತೀರಿಸಿಕೊಳ್ತಿದ್ದಾರೆ. ಅನುಷ್ಕಾ ಅವರನ್ನ ನೋಡಿ ರಶ್ಮಿಕಾ ಕಲಿಯಲಿ ಎಂದು ತರಾಟೆ ತೆಗೆದುಕೊಂಡಿದ್ದಾರೆ.

ಅದೇನೇ ಆಗ್ಲಿ, ಅನುಷ್ಕಾ ಶೆಟ್ಟಿ ಕನ್ನಡ ಪ್ರೀತಿಗೆ ಹ್ಯಾಟ್ಸಾಫ್​ ಹೇಳಲೇಬೇಕು. ನಮ್ಮ ರೈಸಿಂಗ್ ಕನ್ನಡ ಕಡೆಯಿಂದಲೂ ಅನುಷ್ಕಾ ಶೆಟ್ಟಿಗೆ ಅಭಿನಂದನೆಗಳು.